Italia:
Venezia:
Aki i tur kaminda ariba nos biahe nos ta entrevista nos hendenan pa nan tin un bunita rekuerdo. Venezia ta eksisti mas ku 1000 ana kaba i ta un atrakshon enorme di turismo. Miones di turista ta pasa dor di su kasi 180 kanal ku ta forma e manera di transport den e siudat aki. Hopi di e kanalnan ta asina smal ku bo mester tin hopi eksperensha pa pasa ku un boto of un gondola dor di dje. Gosando den e gondola i pasando dor di henter e siudat na unda no tin autos. Un paseo den e gondola dor di e presioso siudat di Venezia ta algo ku ta bale la pena i ku tur hende ku bishita Venezia mester hasi.
Aki por apresia e sentro di Venezia i su famoso "Canale Grande".
Roma:
Esaki ta un di e edifisionan mas historiko ku bo mester bishita ora bo ta na Roma.Hopi di nos pasaheros durante di nan merdia liber na Roma enbes di bai shopping nan ta bolbe bek na e Colosseum i tuma parti na un tour speshal na unda un splikashon dor di guianan profeshonal na diferente idioma ta worde duna di e historia di e Colosseum.
Aki nos por apresia e bisti di un soldat di antes den e tempu di e gladiadornan. Tin algun kaminda na unda bo por paga pa bisti e uniform di e soldatnan romano i saka un portret komo rekuerdo. Dilanti di e portanan di e Colosseum hopi di e pasaheronan di ekskurshon Leu fo`i Kas ta tuma nan tempu pa saka diferente portret huntu ku hendenan bisti komo gladiador kual ta un bunita rekuerdo di nan bishita na Roma.
Vaticano: Na Roma nos ta dedika kasi un dia kompletu pa bishita e Vaticano pasobra tin asina hopi kos di mira ku hasta un dia ta mucho poko. E Vaticano ta e kathedral mas grandi di mundo i ta un siudat ariba su mes den kurason di Roma.E portret aki a worde saka dilanti di e Vaticano ku un bunita bista ariba e Plaza San Pedro. Nos ta tuma un otro dia kompletu pa bishita otro kathedralnan importante i sitionan di gran balor historiko ku tin asina hopi den e tremendo siudat aki. Naturalmente tambe ta sobra tempu pa esnan ku kier bishita otro sitionan bunita of usa nan tempu pa shopping.
